Dy persona janë arrestuar dje nga specialistët për Hetimin Krimit Ekonomik, pasi akuzohen se falsifikonin dokumente dhe letërnjoftime me qëllim kalimin e personave jashtë kufijve. Arrestimet janë bërë në Tiranë, ndërsa hetimi nga Policia e Durrësit.
Kështu, në prangat e policisë kanë rënë Hasan Milushi 50 vjeç, si dhe Fatmir Stankova 49 vjeç, që të dy banues në Tiranë. Ata u kapën në flagrancë tek rruga e “Kavajës”, duke shkëmbyer disa dokumente italiane dhe fotografi të personave të ndryshëm, të cilat dyshohen se janë të falsifikuara.
Pas një hetimi 1-mujor me metoda speciale është finalizuar me sukses operacionin e koduar “Sogiorno”.
Ndërkohë që vijon puna për identifikimin e personave të tjerë të implikuar në këtë aktivitet kriminal dhe zbulimin e vendit ku kryhej falsifikimi i dokumenteve.
Materialet i kaluan Prokurorisë së Rrethit Gjyqësor Durrës për veprime të mëtejshme për veprat penale “Falsifikimi i dokumenteve” dhe “Falsifikimi i letërnjoftimeve, pasaportave ose i vizave”.
